အမှန်ကိုဝန်ခံကြရအောင် စာစု(၁)

Tuesday, December 22, 2009

အမှန်ကိုဝန်ခံကြရအောင်....စာစု(၁)

ဗေဒင်ဆရာတဲ့....။
ကဲ ကွဲကိန်းတဲ့ဗျားးးးးးးးးး။ ကိုရွှေဆရာ ရွှေဥာဏ်တော် စူးရောက်လို့ ဟောလိုက်ပုံက။ မကွဲချင်ရင် ဆရာ့ဆီမှာ အဆောင်ရှိတယ်တဲ့။ ဒါပေမယ့် ဒီအဆောင်က လိုချင်တိုင်းတော့ယူလို့မရဘူးတဲ့။ အင်္ဂါနေ့မှ လာယူရမယ်တဲ့။ အဆောင်ခကတော့....။ လွန်ခဲ့တဲ့ ကိုးနှစ်ကျော်ကျော် လောက်ကပါ။ တာချီလိတ်မြို့မှာ စာရေးသူနေထိုင်ခဲ့စဉ်က တာချီလိတ်မြို့ရွှေတိဂုံဘုရားခြေတော်ရင်းနားမှာ...ဆိုင်ခန်းကျကျနနနဲ့ ဟောပြောနေတဲ့ နာမည်ရဗေဒင်ဆရာ တစ်ဦးပါ။ ဟောချလိုက်ပုံက..အဲသလို..။ မှန်တာတွေလည်း အထိုက်အသင့် ပါအောင်ဟောနိုင်ပါတယ်။ ဒါပေမယ့် လုပ်ကွက်ကလည်း...အဲသလို ထည့်ထားတယ်။ စာရေးသူက စဉ်းစားပါတယ်။ ဘာပြန်ပြောသင့်သလဲလို့။ နောက်တော့ .....စိတ်မရှိပါနဲ့ဆရာ..ကျွန်တော်တစ်ခုလောက် ပြောပါရစေ။ ဆိုတော့ ...ပြောပါပြောပါ။ ရပါတယ်..တဲ့။

ကျွန်တော်မယုံဘူးဆရာ။ ဆရာပေးတဲ့အဆောင်ကို ဆရာပြောသလို ဖက်ခေါင်းအုံးထဲထည့်အိပ်ရင် ...လင်မယား မကွဲဘူးဆိုတဲ့ စကားကို မယုံဘူးဆရာလို့ ပြောလိုက်ပါတယ်။ ဘာဖြစ်လို့လည်း ဆိုတော့...ကျွန်တော့် အိမ်ထောင်ရေးကံကို ကျွန်တော်ပဲပိုင်တယ်။ ကျွန်တော်ပဲ ဆုံးဖြတ်စီရင်လို့ရတယ်။ ဆရာပေးတဲ့အဆောင်က ၀င်စီရင်ပေးလို့မရဘူး။ ကျွန်တော်ကသာ မေတ္တာကုန်လို့ ချစ်သဒ္ဓါမြုံခဲ့ပြီဆိုရင် ဒီအိမ်ထောင်ရေးကို အချိန်မရွေး စွန့်ပစ်နိုင် ကွဲကွာနိုင်ပါတယ်။ ကွဲကိန်းကြုံမှ ကွဲမှာမဟုတ်ပါဘူးလို့။ နောက်တစ်ခုကကျွန်တော့်စိတ်ကို ကျွန်တော်က သိနေတော့ ဆရာပြောတဲ့ကွဲကိန်းကိုလဲမကြောက်သလို အဆောင်ကိုလည်းမယုံဘူးခင်ဗျာ။ ဘာလို့လည်းဆိုတော့ ကျွန်တော်က သီးခံမေတ္တာထားပြီး အိမ်ထောင်ရေးကိုတည်ဆောက်နေတာကတစ်ကြောင်း၊ သားသမီးအပေါ်မှာ အင်မတန် သံယောဇဉ်ကြီးတာက တစ်ကြောင်းကြောင့် ဖြစ်တယ်။

ဒါပေမယ့် ဆရာက ဒါကို မသိရှာဘူး။ ဒီတော့ ဒီဟောကိန်းနဲ့ကျွန်တော့်ကိုခြောက်တာပေါ့။ အဲဒီ့မှာ အဲဒီ့ဆရာက ပြောရှာပါတယ်။ သုံးလအတွင်းကွဲကိုကွဲရမယ်တဲ့။ ကျွန်တော်ကလည်း ဟုတ်လား၊ ဒါဖြင့် သုံးလကျော်ရင် ကျွန်တော်ပြန်လာခဲ့မယ်ဆရာလို့ ပြောခဲ့လိုက်ပါတယ်။ ရန်မဖြစ်ကြပါဘူး ကျွန်တော်နဲ့ ဗေဒင်ဆရာနဲ့။ ဒါပေမယ့် စိန်တော့ခေါ်ခဲ့တယ်ဆိုပါတော့။

သူကလည်း တော်တော်ကို သေချာတဲ့ကိန်းနဲ့မိနေလို့ ဟောပုံရပါတယ်။ ခက်တာက ကျွန်တော်ကလည်းအတော်ကိုခေါင်းမာပြီး မှန်တယ်ထင်ရင် နောက်မဆုတ်တတ်တဲ့သူ။ ဒီတော့ တွေ့တော့တာပေါ့။ သိပ်တော့မမှတ်မိတော့ဘူး။ ကျွန်တော့်အထင် 2000 လား 2001 လားပဲထင်တယ်။ တာချီလိတ်မြို့မှာ ....အမြောက်ဆံတွေ ဘာတွေကျ..အက်စ်အက်စ်အေနဲ့ မြန်မာစစ်တပ်နဲ့ တိုက်ကြခိုက်ကြဖြစ်တဲ့ ကာလပေါ့။ ထိုင်းနဲ့လည်းတံတားတွေပိတ် ..ဂျိတ်..၊ ဘာညာဖြစ်ကုန်ကြတဲ့ကာလ ဆိုပါတော့။ အဲသည်လိုမဖြစ်ခင်မှာ ဗေဒင်ဆရာနဲ့ကျွန်တော်စိန်ခေါ်တမ်း ပေါ့ဖြစ်ခဲ့ကြတာပါ။ သူဟောပြီး နှစ်လလောက်အကြာမှာ ကျွန်တော် တာချီလိတ်ကနေ မွေးရပ်မြေ အညာကို ခေတ္တပြန်ရောက်ခဲ့ပါတယ်။ တစ်လကျော်ကျော်ကြာမယ်ထင်တယ်။ ဇနီးနဲ့သမီးကို ခွဲနေရတာပေါ့။ သူပြောတဲ့ကွဲကိန်းက ဒါကိုးးးးးးးးးး။ အဲဒီလိုနေနေစဉ်မှာပဲ ..တာချီလိတ်မြို့မှာ စစ်ဖြစ်နေတယ် ကြားတော့ ချက်ချင်းပဲ ..ကျွန်တော်တာချီလိတ်ကို လေယာဉ်နဲ့ ပြန်သွားခဲ့ပါတယ်။ မှတ်မှတ်ရရ တာချီလိတ်ကိုအသွား လေယာဉ်တွေက ချောင်ချိနေပြီး အပြန်
လေယာဉ်တွေကတော့ လူပြွတ်သိပ်အပြည့်ပါပဲ။ စစ်ဖြစ်နေတဲ့ကာလကိုး။ ဒီကကောင်ကတော့ သားဇောမယားဇောနဲ့ ကြောက်ခဲ့မိဘူး။ သွားချင်စိတ်ပဲရှိတယ်။ စိုးရိမ်စိတ်ပဲရှိတယ် မိသားစုအတွက်..၊ကိုယ့်ဇနီးရဲ့မိဘတွေကလည်းအစိုးရ၀န်ထမ်းတွေဆိုတော့..
သူတို့နဲ့အတူနေနေတဲ့ကျွန်တော့်..
့်မိသားစုလေးမှာတာချီလိတ်မြို့မှာ အန္တရာယ်ဘာညာ ကျရောက်နေမှာပဲစိုးရိမ်ခဲ့တယ်။


ထားပါတော့..။ ကျွန်တော်ပြန်ရောက်သွားတယ်။အခြေအနေတွေအားလုံး အေးဆေးတည်ငြိမ်သွားပြီး ကိုရွှေဗေဒင်ဆရာပြောတဲ့ သုံးလကျော်ပြီး လေးလမြောက်ထဲမှာပေါ့ကျွန်တော်က ကျွန်တော့်သမီးလေးနဲ့အတူ ရွှေတိဂုံဘုရားခြေတော်ရင်းက တီးဆိုင်လေးမှာ ထိုင်နေတုန်းမှာပဲ .....ကိုကိုဗေဒင်ဆရာနဲ့ ပြန်ဆုံလိုက်ရပါတယ်။ သူကပြုံးပြရှာပါတယ်။ သူပြုံးတာက ပြုံးတာနဲ့တော့သိပ်မတူဘူး။ ဘာနဲ့တူမှန်းလဲ
ခုထိကျွန်တော်မသိခဲ့ပါဘူး။

ကဲ.....................................................................

ဒီဇာတ်ကြောင်းကို ကျွန်တော်ရေးပြရတာက သူ့ကိုမုန်းလို့ မဟုတ်ပါဘူး။ ကျွန်တော်တို့မြန်မာလူမျိုးတွေ မျက်ကန်းယုံကြည်တတ်တဲ့စရိုက်ကို ပြင်စေချင်လို့ပါ။ မယုံပါနဲ့။ ကိုယ့်ကိုယ်ကို သာ ယုံပါ။ ကိုယ်လုပ်တာက တစ်ကယ်ဖြစ်လာမှာ။ မယုံရင်လူသတ်မှုကျူးလွန်ကြည့် ..ထောင်ကျမယ် မပူနဲ့။ ဘာယတြာမှချေလို့ မရဘူး။ ဗေဒင်ဆရာဆိုတာ တန်ခိုးရှင်မဟုတ်ဘူး။ အကြံပေးသူသာဖြစ်တယ်။ ဘာကိုအကြံပေးတာလည်း ။လောကသဘာဝ ဓမ္မတာ သဘောအရ..ဖြစ်တတ်တာ ဖြစ်သင့်တာလေး
တွေကို ...အကြံပေးရတာပါ။ ဘာလေးကိုတော့ ဘယ်လိုလုပ်ပါ။ ဒါမှ မင်္ဂလာတရားနဲ့ညီမယ်။ မင်္ဂလာတရားနဲ့ညီရင် ကောင်းကျုိးချမ်းသာဟူသည်ဖြစ်တာပါပဲ။ မင်္ဂလာတရားနဲ့ညီအောင်မနေပဲနဲ့တော့ ဘာကောင်းကျိုးမှ မမျှော်လင့်နေပါနဲ့။ အခုဖြစ်စဉ်မှာပဲကြည့်ပါ။ ဗေဒင်ဆရာတစ်ယောက်က လင်မယားကွဲကိန်းမြင်တယ်။ ယတြာရောင်းစားတယ်။ ထိုက်သင့်တဲ့ဥာဏ်ပူဇော်ခလည်း ယူပြီးပြီ ။ ယတြာကို ဈေးခေါ်ပြီး ထပ်ငွေတောင်းတယ်။ အကယ်လို့သူ့ယတြာက စွမ်းတယ်ဆိုတောင်...ကိုယ့်ဆီကိုအားကိုးလို့ ယုံကြည်လို့ ဥာဏ်ပူဇော်ခချီးမြှင့်ပြီး ဗေဒင်မေးလာသူရဲ့အိမ်ထောင်ရေးကို ငွေမပေးရင်မကာကွယ်ပေးတော့ဘူး။ ဒါဟာ ဆရာကောင်းတစ်ယောက်..လုပ်ရမယ့်အလုပ်မဟုတ်ဘူး။ ဒါဆို ဒီလူဆရာကောင်းမဟုတ်ဘူး။ ဆရာကောင်းမဟုတ်ရင်...ဘာမှတွေးမနေနဲ့..။ ဘာမှမယုံကြည်နေနဲ့။ ရှင်းတယ်။ ကျွန်တော်ဒီနေရာမှာ ကျွန်တော်အပါအ၀င် ဗေဒင်ဆရာအားလုံးကို ပြောချင်တာက ...ကိုယ့်ဆီကို ယုံကြည်အားကိုးလို့ ကိုယ်သတ်မှတ်ထားတဲ့ ဥာဏ်ပူဇော်ခကို ချီးမြှင့်ပြီး ..ကိုယ့်ကိုထမင်းကျွေးတဲ့ ဗေဒင်မေးသူတွေကို မလိမ်ပါနဲ့။ မယုတ်မာပါနဲ့။ မဖြီးပါနဲ့။ ဒါတော်တော် သက်သက်ညှာညှာပြောလိုက်တာပါ။
ဗေဒင်မေးသူတွေကိုပြောချင်တာကတော့....ဗေဒင်ဆရာဆိုတာ တန်ခိုးရှင် ဖန်တီးရှင်တွေမဟုတ်ပါဘူး။ အကြံဥာဏ်ပေးလမ်းညွှန်သူများသာ ဖြစ်တယ်ဆိုတာပါပဲ။

သုတေသီ ဝေသာလီမောင်ဖုန်း

waitharlimgphone@gmail.com

Post a Comment
 

Posts Comments

©2006-2010 ·TNB