စိတ်တန်ခိုး ဖြင့် အောင်နိုင်ခြင်း

Friday, December 17, 2010

စိတ်တန်ခိုး၏ မြစ်ဖျားဒေသ

လူတို့သည် ကမ္ဘာဦးအစကာလမှပင် အစပြုပြီး ၊ ကိုးကွယ်အားထားရာ ကို မျှော်ကိုးလိုလား မှု ရှိခဲ့ကြ၏။ လူတို့သည် သူတို့၏ ရင်တွင်းမှ ကြောက်ရွံ့ စိုးရွံ့များ အတွက် ခိုကိုးရာ တစ်စုံတစ်ရာ ကို ငတ်မွတ်တောင့်တ တတ်ကုန်၏။
သို့ဖြင့်ပင် အင်အားကြီးမည်ဟု ၄င်းတို့ယုံကြည်ယူဆသော အချင်းအရာတို့ကို အားကိုးအားထားပြု ကိုးကွယ် ပူဇော်ခြင်း ပြုခဲ့ကြသည်။ အချို့က  ငှက်ကြီးများကို ကိုးကွယ်ကြသည်။ အချို့က  မီးကို ကိုးကွယ်ကြသည်။ အချို့က  နေကို ကိုးကွယ်ကြသည်။ အချို့က မြွေကြီးများကို  ကိုးကွယ်ကြပြန်သည်။ လူသည် အင်အားကြီးလျှင် ၊ မိမိအကျိုးစီးပွားကို ပြုခြင်း ၊ ဖျက်ခြင်း တစ်စုံတစ်ရာ ဖန်တီးပေးနိုင်လျှင် ထိုအရာ ကို ကိုးကွယ်၏။ သာမန်ထက် ကျော်လွန် ထင်ရှားပြီး ..စွမ်းဆောင်ရည် မြင့်မားသော အရာတို့သည် ကိုးကွယ်အားထားရာ အချင်းအရာများ ဖြစ်လာ၏။ မြင်ရသည် ဖြစ်စေ ၊ မမြင်ရသည် ဖြစ်စေ … မိမိယုံကြည်ရာ ကို ကိုးကွယ်ကြ၏ ။

ထိုမှတစ်ဖန် .. ဘ၀တူ လူသားအချင်းချင်းမှ  … မြင့်မြတ် ကြီးမြတ်သည် ဟု အများက ယုံကြည်ရသော သူတို့ကို အချင်းချင်း ကိုးကွယ်အားထားမှု ပြုကြရပြန်သည်။ သို့ဖြင့်ပင် လူအမျိုးမျိုး ၊ ယုံကြည်ရာ အမျိုးမျိုး ၊ ဘာသာအမျိုးမျိုးလည်း ထွန်းကားလာ၏။ အဆိုပါ ၄င်းတို့ က ကြီးမြတ်သည်ဟု ယုံကြည်ယူဆသော လူသားအကြီးအကဲမှ မှန်သည်ဟု လမ်းညွှန်ပေးသော အချက်တို့ကို …နှောင်းလူများက လိုက်နာကြ၏ ။ ထိုကြီးမြတ်သည်ဟု ယုံကြည်ရသော လူသားအကြီးအကဲ .. မရှိတော့သည့်တိုင်အောင်ပင် … ထိုပုဂ္ဂိုလ် မှ ..မှန်ကန်သည်ဟု လမ်းညွှန်ပေးခဲ့သော လမ်းညွှန်ဆုံးမမှုများ ဖြင့် ဘာသာတရား တို့သည် ယနေ့ထက်တိုင် သက်ဝင်နေကြဆဲ ဖြစ်လေသည်။

အဘယ်ကြောင့် ဘာသာတရားတို့ကို လူသားတို့ အလေးအမြတ်ထား ကြသနည်း ။ လိုက်နာကျင့်သုံးကြသနည်း ။  အဓိကအရင်းပြုစိတ်မှာ မိမိတို့အကျိုးစီးပွား ကို လိုလားစိတ် ဖြစ်၏ ။ ဘာသာရေးအရ ဖြစ်စေ မိမိတို့အနေနှင့် ထိုထိုအချက်တို့ကို လိုက်နာလျှင် အကျိုးရှိမည် ဟု ယုံကြည်လျှင် လုပ်၏။ ယုံကြည်စိတ် သည် အလွန် တန်ခိုးကြီး၏ ။ ယုံကြည်မှုကို စော်ကားခံရခြင်းသည် အမြင့်မားဆုံးအဆင့် စော်ကားခံရခြင်း ဖြစ်၏ ။ ယုံကြည်လျှင် ဘာမဆို ဖြစ်နိုင်၏ ။  မယုံကြည်လျှင် ဘာမှကို မဖြစ် ။ အကျိုးရှိမည် ဟု ယုံကြည်သော စိတ်သည် တန်ခိုး တစ်မျိုး ပင် ဖြစ်၏။ ထိုစိတ်တန်ခိုး ကို အချို့သော သူတို့က နားလည် သဘောပေါက်ပြီး ကောင်းစွာ အသုံးချနိုင်စွမ်း ရှိသွားကြ၏။

စိတ်တန်ခိုးဖြင့် သန်းကြွယ်သူဌေး ဖြစ်လာသူများစွာ ရှိ၏ ဟု ဆိုလျှင် စာဖတ်သူအချို့ က ရယ်သွမ်းသွေး မိကြနိုင်၏ ။ စိတ်တန်ခိုးဖြင့် အသေခံသွားသူများလည်း ရှိ၏။ စိတ်တန်ခိုးဖြင့် ..အပြုသဘော ဖန်တီးနိုင်၏ ။ စိတ်တန်ခိုးဖြင့် အပျက်သဘော ဖျက်ဆီးပစ်နိုင်၏။ အမေရိကန်နိုင်ငံ ဝေါ့ထရိတ်စင်တာ သည် စိတ်တန်ခိုးဖြင့်  တိုက်ခိုက်ခံရခြင်းဖြစ်၏။ လေယာဉ်က တိုက်သည် မဟုတ်။ လေယာဉ်ပေါ်မှ အကြမ်းဖက်သူ တို့၏ စိတ်တန်ခိုးက တိုက်ခိုက်လိုက်ခြင်း ဖြစ်၏။ အဘယ်ကြောင့်ဟူမူ စိတ်တန်ခိုးဟူသည် မှာ ယုံကြည်မှု မှ မြစ်ဖျားခံ လာသော စွမ်းအားတစ်ရပ် ဖြစ်ခြင်းကြောင့်တည်း ။

ဤလောက၌ အကြီးမားဆုံး အခိုင်မာဆုံး ယုံကြည်မှုအုတ်မြစ် မှာ ဘာသာတရားတို့ ပင်ဖြစ်၏ ။ ထို့ကြောင့်ပင်လျှင် ဘာသာတရားတို့မှ နေပြီး အလွန်စွမ်းအားကြီးမားသော စိတ်တန်ခိုးများ ရရှိလာနိုင်၏။ ထိုစွမ်းအားကြီးမားသော စိတ်တန်ခိုး တို့ကြောင့်ပင်လျှင် အောင်မြင်မှုကြီးများကို ရရှိနိုင်ပြန်၏ ။ သို့ဖြစ်ခြင်းကြောင့် ဘာသာတရား ကြည်ညိုကိုင်းရှိုင်းမှု စိတ်သည် တန်ခိုးတစ်ရပ်အဖြစ် အကျိုးပြုနိုင်ခြင်းဖြစ်လေသည်။ အဘယ်အရာကိုမျှ မယုံကြည်ပါဘဲကနှင့် … အဘယ်မည်သော စိတ်တန်ခိုးသည် ဆောင်ပါ့မည်နည်း ။ အဘယ်မည်သော  စိတ်တန်ခိုး တစ်စုံတစ်ရာ ရေရာသဲကွဲ မဆောင်နိုင်သူသည် ….လောကတွင် အောင်မြင်ပါဦးမည်လော။

အချို့သော လူငယ်များတွင်  ဘာသာတရားတို့ကို မထီမဲ့မြင်ပြုစိတ် သော်လည်းကောင်း ၊ မိရိုးဖလာအဖြစ် မတတ်သာသဖြင့် လက်ခံထားရခြင်းမျိုးသော်လည်းကောင်း ၊ မိမိကိုယ်မိမိ ငါသိသည် ငါတတ်သည် ဟူသော ငါထက်မြက်သည်ဟု ယုံကြည်စိတ်သာ လွန်ကဲသဖြင့် လည်းကောင်း …ဘာသာတရား ယုံကြည်မှုတွင် အားနဲလျော့ကျခြင်း ၊ အချို့မှာ ဘာသာကင်းမဲ့သူအဖြစ် ရောက်ရှိသွားကြခြင်း ၊ အချို့မှာ ထက်မြက်သော ပင်ကိုယ်စွမ်းရည်ကြောင့် ရုပ်ဝါဒီ  ဆန်လွန်းပြီး …နာမ်ပိုင်းဆိုင်ရာအသိ ချို့တဲ့သွားကြခြင်း  မျိုး  ရှိနေတတ်ကြ၏။ ၄င်းတို့မှာ အတ္တဟိတ ဆိုင်ရာ ယုံကြည်ချက်အပေါ်တွင်သာ  စိတ်တန်ခိုး တည်ဆောက်မိနေသူများ ဖြစ်ကြ၏။

လောက၌ ထူးခြားထက်မြက်စွာ အောင်မြင်လိုပါက ထိုမျှသာဖြစ်သော အတ္တဟိတဆိုင်ရာ ယုံကြည်ချက် မှ ပေါက်ဖွားလာသော စိတ်တန်ခိုး ငယ်ငယ်မျှနှင့် မအောင်မြင်နိုင် ။ ပရဟိတဆိုင်ရာ ကျယ်ပြန့်နက်ရှိုင်းသော ယုံကြည်ချက် (ဘာသာတရားနှင့်ဆိုင်သော ယုံကြည်ချက်) မျိုး မှ ပေါက်ဖွားလာသော ကြီးမားသည့် စိတ်တန်ခိုး တို့ကသာလျှင် လောကကို လွှမ်းခြုံနိုင်သည် အထိ အောင်မြင်နိုင်၏။ ကိုယ်ကျိုးပြုအဓိကထားသော စိတ်တန်ခိုး ငယ်ငယ်တို့မှာ  ၀ါးလုံးခေါင်းထဲ မီးသီးထည့်ထွန်းသည့်နှယ် …လင်းတော့လင်းပါရဲ့ …၊ မဖြန့်သာ မပြန့်သာနိုင် ။ ငါ့အတွက်သာဟူသော ကန့်သတ်ထားသည့် ဘောင်ကျဉ်းကျဉ်းလေးထဲတွင် ပိုးစုန်းကြူးဖင်မှ မီးလင်းလင်းကလေးနှယ် တစ်ကိုယ်ရည် အလင်းဖြင့် ဘ၀ဆုံးခြင်းသို့သာ တိုင်ရလေသည်။

စိတ်တန်ခိုး၏ စေညွှန်ရာ

နိုင်ငံရပ်ခြားတွင် အလုပ်အကိုင် လုပ်ကိုင်လိုသော စိတ်တန်ခိုးရှိလျှင် ၊ လုပ်ကိုင်ရန်အခွင့်အလမ်းသည် လည်း အကြောင်းအားလျော်စွာ ပေါ်ပေါက်လာတတ်၏။ အဘယ်ကြောင့်ဟူမူ စိတ်တန်ခိုးသည် လမ်းကြောင်းတူရှုဦးတည်ရာသို့ ထွင်းဖောက်ရွေ့လျား တတ်ခြင်း သဘာဝရှိခြင်းကြောင့်တည့် ။ စိတ်တန်ခိုး၏ ရှေ့တွင် လူသားတို့၏ အခက်အခဲနံရံ များ ရှိတတ်ကြ၏။ ထိုနံရံများကို စိတ်တန်ခိုးဖြင့် ပထမဦးစွာ ထိုးဖောက်နေကြရ၏ ။ နံရံကထူလေလေ စိတ်တန်ခိုးက ထက်မြက်ဖို့လိုလေလေ ဖြစ်၏ ။ စိတ်တန်ခိုးနဲပါးသူတို့မှာ …စေလိုရာမစေနိုင်သော ..အားနဲသော လူတန်းစားများပင်ဖြစ်ကြသည်။ စိတ်တန်ခိုး အားကောင်း သူတို့မှာ ၊ လူလူချင်းယှဉ်လျှင်ပင် သူတစ်ပါးတို့ထက် ထက်မြက်သိသာ၏ ။ စိတ်တန်ခိုး အားကောင်းလျှင် သွားလေရာ လမ်းဖြစ်၏ ။ အဘယ်ကြောင့်ဟူမူ ထိုသူ၏ ရှေ့တွင် စိတ်တန်ခိုးက ဦးစွာ ထွင်းဖောက်ရွေ့လျားနေခြင်းကြောင့်တည်း။

ယောက္ခမကြီးကို မြန်မြန်ပြန်စေလိုသည့် စိတ်တန်ခိုးသည် ကြီးမားလာပါက ၊ ယောက္ခကြီးလည်း မြန်မြန် ပြန်ရတော့သည်သာ ဖြစ်၏ ။ အလွန် ထီပေါက်လိုသည့် စိတ်တန်ခိုးကြောင့် ထီလည်းပေါက်ရတော့၏ ။ ပေါက်ချင်နေရုံနှင့်တော့ ပေါက်လိမ့်မည်ကားမဟုတ် ။ ပေါက်မည်ဟူသော စိတ်တန်ခိုး အလွန်ကြီးမားတောက်ပလာလျှင်မူ ပေါက်ကို ပေါက်တော့သည်သာ ။

စိတ်တန်ခိုးကို လိုသလို ထိမ်းကွပ်နိုင်သူသည် ကြောက်မက်ဖွယ်ရာကောင်းသော စွမ်းအားပိုင်ရှင်မျိုးဖြစ်၏။ X-Men ဇာတ်ကား ထဲမှ စိတ်စွမ်းအားရှင်များ သည် ကြည့်ပျော်ရှုပျော်မျှသာ ဖြစ်၏။ တစ်ကယ့်စိတ်တန်ခိုးပိုင်ရှင် သည် အလိုရှိရာကို ဖန်တီးနိုင်၏ ။ ဥုံဖွဟူပြီး ဖန်တီးသည်ကား မဟုတ် ။ စိတ်တန်ခိုး၏ ထိပ်ဦးကို အလိုရှာရာဘက်သို့  ..ဦးတည်ပေး လိုက်ခြင်းသာ ဖြစ်လေသည်။

စိတ်တန်ခိုး ကို လူတိုင်း လေ့ကျင့်အသုံးပြုနိုင်၏ ။ သို့သော် မသိသူများလှ၏ ။ ထို့အတူ ..သိသူများတွင်လည်း ကျင့်ကြံအသုံးပြုနိုင်သူ နဲပါးကြ၏။ ကျင့်ကြံအသုံးပြုနေသူများတွင် လည်း  စိတ်တန်ခိုးကို ထိမ်းကွပ် ပြီး လိုသလိုအသုံးချနိုင်သည့် အဆင့်သို့ ရောက်သူ နဲပါး၏။ ထို့ကြောင့် တစ်ရာလျှင်တစ်ယောက် ၊ တစ်သိန်းတွင် တစ်ယောက် ၊ တစ်သန်းလျှင် တစ်ဦး ၊ သန်းပေါင်းများစွာတွင် တစ်ယောက် …မျှသာ ထူးထူးခြားခြား ပေါက်မြောက်ထင်ရှားခြင်း ဖြစ်၏။

လူတိုင်း သမ္မတ/အုပ်ချုပ်သူ  မဖြစ် ။  လူတိုင်း နိုဗယ်လ် ဆု ရသူ မဖြစ်  ၊ လူတိုင်း သန်းကြွယ်သူဌေးမဖြစ် ၊ လူတိုင်း လျှမ်းလျှမ်းတောက် အောင်မြင်သော ပညာရှင်မဖြစ် ။ လူတိုင်း  .. အသည်းအသန်အောင်မြင်သော အနုပညာရှင် မဖြစ် ။ ထို့ထက်ရှင်းရှင်းဆိုရပါမူ .. လူတိုင်း ဆရာမင်းသိင်္ခ မဖြစ်  ။  လူတိုင်း စံဇာဏီဘို မဖြစ်  ။  လူတိုင်း  ဦးကျော်ဟိန်းမဖြစ်  ။  လူတိုင်း  ဆရာ ဦးမောင်မောင်သန်း မဖြစ် ။ လူတိုင်း အမေစု  မဖြစ်  ။  မဖြစ် ..မဖြစ် ..မဖြစ် ….ရခြင်းပင် ။

 စိတ်တန်ခိုးဖြင့်  ထွင်းဖောက်ခြင်း

ဗျို့ ဆရာဖုန်း ..ခင်ဗျားကောဗျ စိတ်တန်ခိုး ရှိရဲ့လား မေးလာနိုင်၏ ။ လူတိုင်းတွင် ရှိ၏ ဟု မောင်ဖုန်းဖြေလို၏။ သို့ရာတွင် မိမိတွင် ရှိသော စိတ်တန်ခိုးကို မိမိကိုယ်တိုင်က အသိမှတ်ပြု လက်ခံလာရန်သည် ပထမဆုံးအဆင့် အရေးကြီး၏ ။ ဆရာဖုန်း စိတ်တန်ခိုးကို လက်တွေ့အသုံးပြုဖူးရဲ့လား ဟု မေးလာသော် …၊ လက်တွေ့လုပ်ကြည့်ပြီးမှ ယုံတတ်သော မောင်ဖုန်းက ဟုတ်သဗျ ..ဟု ဖြေ၏။ နာရီမိနစ် ပိုင်းပြီး ဖြစ်မြောက်စေသော စိတ်တန်ခိုးတစ်ရပ် ကို လက်တွေ့စမ်းသပ်ဖူး၏။ ဘယ်နေ့ဘယ်အချိန် ဘယ်နှစ်နာရီ မိနစ်အတွင်း ဖြစ်မြောက်စေရမည် ဟူသော စိတ်တန်ခိုး မျိုးကို မွေးမြူခဲ့ဖူး၏။ မှတ်မှတ်ရရ စာရေးသူ၏ အသက်ပိုင်း ၂၇ နှစ်အရွယ်တွင် ဖြစ်၏ ။ နေရာအားဖြင့် ..အထက်အညာ သဲတော-၀မ်းတွင်းမြို့ အရှေ့ဘက် ကုန်းမြင့်ဝိပသနာကျောင်း တွင် ဘုရားရှင် သားတော်ဘ၀ဖြင့် ရောက်ရှိနေစဉ် အဆိုပါ စိတ်တန်ခိုးမျိုးကို လက်တွေ့အသုံးချခဲ့ဖူး၏ ။ (နောင်သောအခါ အသေးစိတ်ကို .. ဦးဇင်းလေး ကျတဲ့မျက်ရည် ဆောင်းပါးတွင် ဖော်ပြပေးပါမည်။ )

ယင်းသို့လက်တွေ့စမ်းသပ်ရာတွင် မောင်ဖုန်းမှာ အတွေ့အကြုံနုနယ်ခြင်း ၊ ဥာဏ်ပညာ မပြည့်စုံခြင်းတို့ကြောင့် ထင်သည် ၊ မိမိသတ်မှတ်ထားသည့် အချိန်နာရီမိနစ် ပြည့်ခါနီး မိနစ်ပိုင်းမျှ အလိုတွင်မှ …စိတ်တန်ခိုးဖြင့်ဆောင်ရွက်သောအချင်းအရာမှာ ပြီးပြည့်စုံခဲ့ရပါသည်။ ထိုမိနစ်ပိုင်းမျှ သာ လိုအပ်တော့သည့်ကာလတွင် မောင်ဖုန်း မှာ ဆောက်တည်ရာပင် မရလောက်အောင် … တုန်လှုပ်လာခဲ့ရပါသည်။ မပြည့်မြောက်ခဲ့ပါတကား ဟု လည်း ယူကျုံးမရ ဖြစ်ခဲ့ရပါသည်။ မိသားစုနှင့် ဆိုင်သော အလိုဆန္ဒတစ်ရပ်ကို စိတ်တန်ခိုးဖြင့် ပြီးပြည့်စုံရန် ကြိုးပမ်းမှုတစ်ရပ် ပြုခဲ့ခြင်းဖြစ်သဖြင့် …၊ မိမိသတ်မှတ်ထားသည့် အချိန်ပမာဏ အတွင်း မပြီးမြောက်တော့ဟု ထင်သွားသည့်အခါ …စိတ်တန်ခိုးလည်း  လုံးဝ လျောကျလုဆဲဆဲ ဖြစ်သွားခဲ့ပါသည်။

သို့သော် ထိုအခိုက်အတန့်လေးမှာပင် …မြင်းလှည်းတစ်စီးသည်  စာရေးသူထိုစဉ်က သီတင်းသုံးနေရာ ကျောင်းတိုက်ဘက်သို့ မောင်းလာသည်ကို တွေ့ရပြီး ၊ ထိုမြင်းလှည်းပေါ်တွင်မူ စာရေးသူ မောင်ဖုန်း ၏ အလိုဆန္ဒ ပြည့်စုံစေရာအကြောင်းတရား တစ်ရပ်သည် မောင်ဖုန်းသတ်မှတ်ထားသော အချိန်နာရီ ပြည့်ရန် မိနစ်ပိုင်းမျှသာအလိုတွင် …လိုက်ပါလာခဲ့ပေသည်။ မောင်ဖုန်း၏ စိတ်တန်ခိုးသည်လည်း မောင်ဖုန်းရင်ဆိုင်နေရသော အခက်အခဲ ဟူသည့် တံတိုင်းကြီးကို ထိုအခါမှပင် လုံးဝရှင်းရှင်း ထွင်းဖောက်နိုင်ခြင်း သို့ တိုင်ခဲ့ကြောင်း သတိပြုမိပေတော့သည်။

အထက်ပါအကြောင်းအရာများသည်   မောင်ဖုန်း၏ ဘ၀ဖြစ်စဉ်မှ ( စိတ်တန်ခိုးနှင့်ပတ်သက်ပြီး အသုံးချနိုင်ရန် )  ကောက်နှုတ်တင်ပြပေးခြင်းသာ ဖြစ်သည်။ ဥာဏ်အလှမ်းကွာသော သူတစ်ချို့အနေ နှင့် အလကားပါ ၊ လူအထင်ကြီးအောင် လျှောက်ရေးနေခြင်းဖြစ်မည် ဟု တွေးထင်ကောင်း တွေးထင်နိုင်ပေသည်။ အရိုးသားဆုံးဝန်ခံရလျှင်  … ယခုဆောင်းပါးကိုဖတ်မိသော ..မိမိတို့ဘ၀တွင် ကြီးမားသောအခက်အခဲကြီးများ ကို ရင်ဆိုင်နေရသော သူတို့ကို ၊ စိတ်တန်ခိုးကို အသုံးပြုခြင်းဖြင့် … ရင်ဆိုင်နေရသော အခက်အခဲနံရံများကို ထွင်းဖောက်နိုင်စေရန် အလို့ငှာလည်းကောင်း ၊ မိမိတို့အလိုရှိရာ အကျိုးစီးပွားကို စိတ်တန်ခိုးညွတ်ကိုင်းလျှက် ပြည့်စုံခြင်းသို့ တိုင်စေရန် အလို့ငှာလည်းကောင်း ၊ အထူးသဖြင့် ငယ်ရွယ်သော လူငယ်များအဖို့ စိတ်တန်ခိုးမွေးမြူခြင်းဖြင့် အောင်မြင်ခြင်းသို့ တိုင်စေရန် အလို့ငှာလည်းကောင်း ရည်သန်ဖော်ပြ အပ်ခြင်းသာ ဖြစ်ပါသည်။

( ယခုဆောင်းပါးတစ်ပုဒ်တည်းဖြင့်မူ အားလုံးအလုံးစုံကို စာဖတ်သူများ သဘောပေါက်ခြုံငုံမိလိမ့်မည် ဟု မထင်ပါပေ။ အကြောင်းအားလျော်စွာ အခြေအနေပေးသည့်အခါများတွင်  စိတ်တန်ခိုးနှင့် ပတ်သက်ပြီး စာဖတ်သူအများ နားလည်လွယ်အောင် ဆက်လက်ရေးသား ပေးပါမည်။ )

အနှစ်ချုပ်ပါတော့မည်။

(၁)  စိတ်တန်ခိုးဟူသည်မှာ ယုံကြည်မှုမှ မြစ်ဖျားခံ၏ ။ ယုံကြည်မှ တန်ခိုးဖြစ်၏ ။ တန်ခိုးဖြစ်မှ ဖန်တီးနိုင် ၊ တည်ဆောက်နိုင်၏ ။ ထို့အတူ ဖျက်ဆီးနိုင် ၊ ချေမှုန်းနိုင်၏ ။

(၂) နှလုံးသား၏ အလိုဆန္ဒအမှန်သည် စိတ်တန်ခိုး၏ ဦးတည်ရာ အစစ်ဖြစ်၏ ။

(၃) စိတ်တန်ခိုးသည် တစ်ကြိမ်တည်းမဖြစ် ၊ အကြိမ်ကြိမ် အခါခါ ထပ်ခါတလဲလဲ ဖြစ်နေပြီးမှ  အရှိန်ငြီးငြီး တောက်ပချွန်မြလာတတ်၏ ။ ထိုအခါမှပင် အလိုရှိရာကို ထွင်းဖောက် ရောက်ရှိုနိင်ခြင်း သို့ တိုင်၏ ။

(၄)  ကြီးမားသော စိတ်တန်ခိုးဟူသည်မှာ ခိုင်မာသော ယုံကြည်ချက် မှ စတင် သန္ဓေတည် ၏ ။ ကြီးမားသော စိတ်တန်းခိုးသည်သာလျှင် အခက်အခဲကြီးများ ကို ထွင်းဖောက်အောင်မြင်နိုင်၏ ။ ကြီးမားသော စိတ်တန်ခိုးရှိမှသာလျှင်  ကြီးမြင့်သော ဘ၀အောင်မြင်မှုများကို ရယူဆွတ်ခူးနိုင်၏ ။

(၅) မိမိတွင် ရှိသော စိတ်တန်ခိုး ကို မိမိကိုယ်တိုင် အသိမှတ်ပြုထင်ရှားစေရာ၏ ။ ယင်းနောက် …အထပ်ထပ်အခါခါ နေ့စဉ် ထိုတန်ခိုးကို မွေးမြူခြင်း ၊ အသိမှတ်ပြုခြင်း ၊ လေ့ကျင့်ခြင်း ပြုလုပ်ခြင်းဖြင့်လည်း ထက်မြလာအောင် သွေးယူနိုင်၏။ ထက်မှ ဖောက်လွယ်၏ ။ ဓါးတုံးဖြင့် အရာမထင်သကဲ့သို့ …အလေ့အကျင့်နဲသော စိတ်တန်ခိုးဖြင့် လည်း မည်သည့်အချင်းအရာကိုမျှ ..မအောင်မြင်နိုင်။

(၆) စိတ်တန်ခိုး၏ ဦးတည်ရာသည် အလွန်အရေးကြီး၏။ အပျက်သဘာဝကို ဦးတည်လျှင် အပျက်သို့တိုင်၏ ။  အပြုသဘာဝ သို့ ဦးတည်လျှင် အပြုသဘောဖြင့် ဖြစ်၏ ။ စိတ်တန်ခိုးကို လိုသလိုထိမ်းကွပ်နိုင်သည့်အဆင့်သည် လူတစ်ယောက်အတွက် မြင့်မားသော အောင်မြင်မှုအရပ်ရပ် ကို အချိန်မရွေး  လှမ်းတက်နိုင်သည့် အဆင့်ဖြစ်ပေသည်။

(၇)   နောက်ဆုံးအဆင့် သတိပြုရန်မှာ … ဆင်ကြီးလောက်လိုချင်ပြီး၊ စိတ်တန်ခိုးက ဆိတ်ကလေးမျှ နှင့်  ဆင်ကြီးကို မရနိုင်ကြောင်း သတိပြုရန် ဖြစ်၏။ ထို့အတူပင် ကာလံဒေသံ ၊ ကျင်လည်ရာအသိုက်အ၀န်း နှင့် ဆီလျော် ညီညွတ်သော စိတ်တန်ခိုးမျိုး မွေးမြူမိရန်လည်း သတိချပ်အပ်၏။ နေတာက မန်ကျည်းတောရွာ ၊ စီးချင်တာက ရေငုပ်သဘောင်္ ၊..စိတ်တန်ခိုးဖြင့် ထွင်းဖောက်သော် ၊ အလှမ်းကွာလှသဖြင့် …တစ်ဘ၀တည်းနှင့်ပင် ထွင်းဖောက်အောင်မြင်ခြင်းသို့ ရောက်နိုင်ဖို့ ခဲယဉ်းတတ်၏။ သေသာသွားရော  …ရွာထိပ်က ကန်ထဲတွင်  ပီပါကို မှောက်ခုံရေထဲနှစ်ပြီး လူဝင်ပြီးသာ ရေငုပ်ဖူးလိုက်ရမည်။ ရေငုပ်သဘောင်္ ကိုမူကား စီးသွားရမည် မဟုတ်ပေတကား။

စိတ်တန်ခိုးဖြင့် လောကကို အောင်နိုင်ကြပါစေ။

ကိုစိုးမိုးထွန်း (ဗေဒင်ပညာသုတေသီ)
 

Post a Comment
 

Posts Comments

©2006-2010 ·TNB