အထင်မသေးပါနဲ့  .. ရင်လေးလွန်းလို့ ရေးလိုက်သည်

Tuesday, November 3, 2009

မဟာဘုတ်ပညာဟုဆိုလျှင်......အချို့က မဟုတ်ဘာ ဟုပင်နောက်ပြောင်ပြောဆိုကြသည်အထိ အထင်မြင်သေးကြသည်။ ခုနှစ်ခုစား အလကား ဟု ပြောကြသူတွေလည်း ရှိကြသည်။ အလွန်စနစ်ကျနပြီး ခေတ်ပညာတတ် မြောက်ထားသော နတ်ခတ်ဆရာတစ်ဦး၏ စာအုပ်နောက်ဆုံးတွင်.....မဟာဘုတ်ပညာ၏ အသုံးမကျပုံများကို ...အတိအလင်းပင် ရှုံ့ချရေးသားထားသည်ကို တွေ့ရပေသေးသည်။ ထိုသို့ရေးသားရာတွင် သူသည်ကြာသာပတေးသား မဟာဘုတ်(၂) ကြွင်း မရဏဖွားဖြစ်ကြောင်း၊ သူ့အား မဟာဘုတ်ဆရာအချို့က ပညာဂြိုဟ် ၅တေး မရဏတွင်ရှိသောကြောင့် ပညာရေးဆုံးခန်းမတိုင်နိုင်ကြောင်း ...ဟောကြားခဲ့သည်မှာ အလွန်မှားယွင်းပြီး၊ သူသည် နိုင်ငံရပ်ခြားသို့တိုင် ပညာတော် သွားရောက်သင်ကြားခဲ့ရသူဖြစ်ကြောင်း၊ ယင်းအချက်များကြောင့် မဟာဘုတ်မှာ မမှန်ကန်နိုင်ကြောင်း စသည်ဖြင့် ရေးသားထားခဲ့သည်ကို ဖတ်ရှုခဲ့ရဖူးပေသည်။

ယင်းနတ်ခက်ဆရာလေး ရော၊ ၄င်းကိုဟောကြားပေးခဲ့သော မဟာဘုတ်ဆရာအချို့ရော ပါ .....မသိကျသေးသည်မှာ မဟာဘုတ်ဌာနတွင် .....ပညာဂြိုဟ် ကြာသာပတေးရပ်တည်ပါက....လောကုတရာ ပညာရပ် ကို သင်ကြားခွင့်ရရှိခြင်း၊ ဝေးလံခေါင်သီသောအရပ်ဒေသများသို့( ယခုခေတ်တွင် နိုင်ငံရပ်ခြားဒေသ) များတွင် ပညာတော်သွားရောက်သင်ကြားရခြင်းမျိုးကို အားပေးလှုံဆော်ကြောင်း ........ကိုပင်ဖြစ်သည်။ ထိုဆရာလေးသည် နတ်ခတ်ပညာကိုမူ အတွေးအခေါ် အယူအဆကောင်းကောင်းဖြင့် တင်ပြသွားနိုင်ခဲ့သူဖြစ်သည်။ စာရေးသူကိုယ်တိုင်ပင် သဘောကျမိပါသည်။ သို့သော် ယင်းဆရာလေးမှာ ........မဟာဘုတ်ပညာကိုမူ အထင်အမြင်သေးမိခြင်းကြောင့်......အလွန်နက်ရှိုင်း ကျစ်လစ်သောပညာရပ်ကို ကျောခိုင်းဝေးကွာခဲ့ရပေသည်။
စာရေးသူအမြင်အားဖြင့်မူ မဟာဘုတ်ပညာသည် ဗေဒင်ပညာရပ်ပေါင်းများစွာတို့၏ အနှစ်ချုပ်ဖြစ်သည်။ လောကသဘာဝနိယာမသဘောတရားတို့ကို စုဝေးပြီးအဆီအနှစ်ထုတ်ကာ မြုပ်နှံထားရစ်ခဲ့သော ရတနာသိုက်တစ်ခုနှင့်လည်း တူပေသည်။ ညွှန်းလှချေလားဟု အချို့က ဆိုနိုင်ကောင်းအံ့ရာ၏။ ထို့ထက်မက ဟု သာ ပြောချင်ပါတော့သည်။ စာရေးသူသည် မဟာဘုတ်ပညာကို အသက်၁၄နှစ်သားကပင် စတင်ထိတွေ့ခဲ့ရ၏။ ယခုထက်တိုင်လေ့လာနေဆဲဖြစ်၏။ သို့တိုင်အောင်ပင် စာရေးသူ၏ ဥာဏ်ရည်အရ ကကြီးရေက အဆင့်သာ ရှိသေးကြောင်းကိုလည်း ၀န်ခံရပေမည်သာဖြစ်၏။ အဆိုပါ ကကြီးရေက သည်ပင် စာရေးသူအတွက် အလွန်ကျယ်ပြန့်သော ပညာရပ်လှေခါးထစ်ကြီးဖြစ်နေ၏။ ယင်းလှေခါးထစ်ကြီးတွင်ပင် စာရေးသူသည် ချာချာလည်နေဆဲဖြစ်၏။ ဖိုးသူတော်မျက်စိလည်သလို........ မျက်စိလည်လေ ဆန်ရလေဆိုသကဲ့သို့ပင် ....စာရေးသူမှာလည်း မျက်စိလည်ရင်း မဟာဘုတ်ပညာရပ်၏ ..ထူးခြားမှုများကို အမှတ်မထင်တွေ့ရှိရရင်းဖြင့် ဟန်ကျသကဲ့သို့ ရှိ၏။ သို့သော် ရှေ့ခရီးကား ထင်သလောက်မပေါက်နိုင်သေး။
အဓိကဆိုချင်သည်မှာ မဟာဘုတ်ပညာရပ်ကို အထင်မကြီးဘဲနေနိုင်ကြ၏။ သို့သော် အထင်သေးရှုံ့ချခြင်းကား မပြုစေလိုပေ။ အထူးသဖြင့် နာမည်ကျော်နက်ခတ်ဆရာကြီးအချို့ ကဲ့သို့ .... တိုင်းသိပြည်သိကျမ်းစာအုပ်များတွင်ထည့်သွင်းရှုံ့ချခြင်းကား အလွန်မှားယွင်းသော ၊ နောင်လာနောင်သားများကို အကျိုးကျေးဇူးဆုတ်ယုတ်စေသော ၊ ပညာရှင်မဆန်သော မှားယွင်းသည့်အပြုအမူများကို ....ရှောင်ရှားစေလိုပေသည်။ ပညာကို လေ့လာနေဆဲကာလတွင်.... မိမိတို့လေးစားရာ ပညာရှင်ကြီးများ၏ စာအုပ်စာပေ ကျမ်းဂန်များကို ဖတ်ရှုလေ့လာရင်း မှ ထိုသို့လွဲမှားသည့် အယူအဆများကို ပါ ပညာလေ့လာသူတို့မှာ ကူးစက် စေနိုင်ပေရာ......ယင်းအပြုအမူမျိုးတို့ကို အထူးရှောင်ရှားရန် လိုအပ်ကြောင်းတင်ပြအပ်ပါသည်။ ...

တစ်ခါက လည်း နက်ခတ်ဆရာတစ်ဦးက စာရေးသူထံသို့ တိုက်ရိုက်ရောက်လာကာ.....မင်းတို့လက်ဆန်းဗေဒင်က နိုင်ငံခြားခရီးက်ိန်းတို့၊ သေက်ိန်း တို့ကို ....ဟောရတော့မယ်ဆိုရင် တစ်ကယ့်တစ်ကယ်ကျတော့ မဟောနိုင်ပါဘူးကွ ဟူပြီး စော်ကားမော်ကားလာ လုပ်ခဲ့ဖူး၏။ ကျွန်တော်ကိုယ်တိုင်ပင် နတ်ခတ်ပညာကို ချစ်မြတ်နိုးသူဖြစ်ပြီး မဟာဘုတ်ပညာကို ထက်သန်စွာလေ့လာနေခြင်းဖြစ်၏။ ထိုအကြင်ဆရာ၏ စော်ကားမှုကို စာရေးသူကလည်း ဆတ်ဆတ်ထိမခံတတ်သည့်အတိုင်း.......၊ သနားကြည့်ဖြင့် ပြုံးပြလိုက်၏။ အပြုံးတွင်အသက်ပါလွန်းရကား မောင်မင်းကြီးသားလည်း တက်ခတ်ပြီး ယနေ့တိုင်မကျေမချမ်းဖြစ်နေသေးသည် ဟူသတတ်။ အမှန်တစ်ကယ်တမ်းတွင်မူ မည်သည့်ပညာမဆို နက်နက်ရှိုင်းရှိုင်းထဲထဲဝင်ဝင် တတ်ကျွမ်းလေလေ.......အသုံးပြုနိုင်စွမ်းမြင့်မား လေလေဖြစ်၏။ နက်ခတ်တွင်ဖြစ်စေ၊ မဟာဘုတ်ပညာတွင်ဖြစ်စေ.........ဂြိုဟ်များကို အသုံးပြုဟောဆိုရခြင်းသာဖြစ်၏။ ဂြိုဟ်တို့၏အကြောင်းကို ထဲထဲဝင်ဝင် သိမြင်နားလည်နေခြင်း ရှိလေလေ၊ အယူအဆလမ်းကြောင်းများ မှန်ကန်လေလေဖြစ်ပေမည်။

ဥပမာအားဖြင့်............. အင်္ဂါဂြိုဟ် သည် ကရကဋ်ရာသီတွင် ရပ်တည်နေသောအခါ.........နတ်ခတ်ဆရာတို့အနက်.....ဂြိုဟ်ပရိယာယ်သဘာဝကို ပိုမိုနားလည်သူတို့မှာ ပိုမိုဟောဆိုနိုင်၏။ နားမလည်ပါက အဘယ်သို့ ဟောဆိုနိုင်မည်နည်း။ နိစ်ဂြိုဟ်ပဲ ဆိုးတယ်လေ။ ဆိုယုံလောက်နှင့် ပြီးတတ်၏။ နားလည်သူကမူ ...ချင့်ချိန်ပေါင်းစပ်တွေးယူတတ်၏။ ကရကဋ်ရာသီသည် တနင်္လာဂြိုဟ်က ပိုင်ဆိုင်သောရာသီဖြစ်၏။ တနင်္လာဂြိုဟ်သည် မည်ကဲ့သို့သော သဘာဝရှိ၏။ ယင်းသဘာဝတရားထဲတွင် ရောက်ရှိနေထိုင်ခွင့်ရလာသော အင်္ဂါဂြိုဟ်သည်မည်ကဲ့သို့သော စရိုက်မျိုး ပြောင်းလည်းလုပ်ဆောင်လာမည်။ စသည်ဖြင့်.........အနုစိတ်ပုံဖော်ကာ တွေးခေါ်နိုင်လာ၏။ အကျိုး နှင့် အကြောင်းကို ပိုမိုသိရှိနားလည်ခွင့်ရ၏။ ထို့အတူ မဟာဘုတ်ပညာတွင်လည်း ပုတိတွင် စနေဂြိုဟ် တည်နေသောအခါ ...ဟောဆိုခိုင်းသော်.၊ ဂြိုဟ်ပရိယာယ် နှင့် ဂြိုဟ်တို့၏ စရိုက်သဘာဝကို ပိုမိုနားလည်သူတို့ကသာလျှင် ပိုမိုဟောဆိုနိုင်၏။ နို့မဟုတ်ပေမူ ပုတိ အပုပ် မှာ စနေတည်၏။ မကောင်းကျိုးပေးမည်၊ ထောင်ကျမည် ။ နတ်ကိုင်မည်။ ထီး ဖိနပ် ဒါး အကျိုးမပေး စသည်ဖြင့် ပေါ့ပေါ့လေး ဟောဆိုရန်သာရှိ၏။

ဂြိုဟ်ပရိယာယ် သဘာဝ ကို ပိုမိုနားလည် ထားသူအဖို့မူ........ ပုတိဌာနသည် တနင်္လာ ဂြိုဟ်ပိုင်၏။ တနင်္လာ သည် မွေးမြူထိမ်းသိမ်း တတ်သော၊ စုစောင်းသိုမှီးတတ်သော အမစရိုက်ရှိ၏။ ယင်းဌာနတွင် ..စနေဂြိုဟ်ကဲ့သို့ဂြိုဟ်မျိုးရပ်တည်လာသော်........မည်သို့မည်ပုံ ..အကျိုးအာနိသင် ပေးစွမ်းနိုင်၏။ စသည်အားဖြင့်.......အကျိုးအကြောင်းကို ထောက်ဆချင့်ချိန်ပြီး ကောင်းစွာ ဟောဆိုနိုင်ပေမည်။ ထိုသို့ အကျိုးနှင့်အကြောင်းကို သေချာစွာချင့်ချိန်လာနိုင်သောအခါ မည်သည့်ပညာရပ်ကိုမဆို အလွယ်တစ်ကူ အထင်သေးခြင်းမျိုး လုံးဝ ပြုနိုင်တော့မည် မဟုတ်ပါပေ။

ယခုအခါတွင် အနောက်နိုင်ငံသားအချို့ပင် မဟာဘုတ်ပညာရပ်ကို ..စနစ်တစ်ကျ လေ့လာသုတေသနပြုနေကြပြီဖြစ်ရာ။ ကိုယ့်လူမျိုး ကိုယ့်ရေမြေ၊ ကိုယ့်ပညာကို ....အထူးတန်ဖိုးထားတတ်ရန် အရေးကြီးလှပြီဖြစ်ပေသည်။ သို့မဟုတ်ပါက အလွန်တန်ဖိုးရှိသောပညာရပ်တစ်ခုသည်....ကျွန်တော်တို့မြေပေါ်မှပျောက်ကွယ်တိမ်မြုပ်သွားပြီး .......အခြားတစ်ပါးသော တိုင်းပြည်ရေမြေတွင် ပြောင်းရွှေ့ရှင်သန်ကြီးထွားလာရန်သာ ရှိပေတော့သည်။ နောင်လာမည့် ပညာရပ်ပိုင်းဆိုင်ရာ အနာဂတ်သည်........လက်ရှိ.....ပညာလေ့လာလိုက်စားနေသော လူငယ်များတွင် တာဝန်အရှိဆုံးဟု စာရေးသူအနေဖြင့်ထင်မြင်မိပါသည်။ သို့ဖြစ်ခြင်းကြောင့်...............ယခုဆောင်းပါးမှ နေပြီး၊ ပညာလေ့လာလိုက်စားနေသော မြန်မာ့ရိုးရာမဟာဘုတ်ပညာ နှင့်လက်ဆန်းဗေဒင်ပညာဆိုင်ရာ လူငယ်များအားလုံးကို .......မိတ်သင်္ဂဟပြုလိုကြောင်း ဖိတ်ခေါ်အပ်ရပါပေတော့သတည်း။

ဝေသာလီမောင်ဖုန်း (ဗေဒင်ပညာသုတေသီ)

 

Posts Comments

©2006-2010 ·TNB